おいしいI!! 充滿驚喜的美味放題

我同男朋友都超鍾意食日本野，平時好鍾意去居酒屋或壽司店食飯，
今次同男朋友慶祝生日，就揀左間放題食喇~

日本放題食過幾間，今次見飲食男女有介紹，
所以就試左o係旺角新開張既呢間餐廳!

幻彩sushi bar

環境不錯，D位大家都見倒，6個人坐o岩o岩好，2個人坐就超闊絡喇~
仲有佢塊板ok高，隔住每台人，有D私人空間，比人好舒適既感覺。

睇得又食得既刺身

一開始先黎刺身拼盆，佢刺身提供既種類都幾多，三文魚一D都唔吝嗇，
新鮮冇雪味! 咁多款刺身放埋一齊仲有唔同顏色既菜伴碟，睇倒都開心啦!

超好味既豆腐

佢既前菜真係有驚喜，冇稔過食放題都可以食倒咁樣既水準!
日式炸豆腐個汁調得好好，豆腐好滑~
蟹籽沙律食落好新鮮! 會feel到D青瓜好新鮮，爽脆!

炸物係我既至愛!

炸蝦好大隻，肉質ok唔會霉，炸漿唔算厚~
o係相度可以見倒佢炸漿做得ok，舊冬菇上面既炸漿都只係薄薄一層，
所以食落去好鬆脆而入面個冬菇又唔會乾水。

炸蝦既close shot!

我地仲有叫左炸蠔同雞軟骨!
炸蠔大大粒，不過不失
雞軟骨一份都好多，香脆，新鮮~
佢o個度仲有香蕉tampura，不過我今次冇試，但係好得意，下次去可以試下!

超大粒任食唔嬲!

佢都有好多燒物可以嗌，最值得推介係帶子!
因為平時出去食一串兩粒既都要$20，但而家新鮮燒好熱辣辣任食唔嬲!
我都嗌左一人一串，淨食呢個都抵番~

燒菠蘿好味，燒完出黎覺得菠蘿好甜~
燒栗米不錯，唔會話燒到乾哂，不過唔係成個圓柱，得一半，適合淺嚐!

紅豆+芝麻+綠茶一次過!

最後一定要推介呢個雪糕! 我一個人食左兩杯，超級飽~
呢個咁圓咁大杯既雪糕為今餐畫上完美既句號!

最開心就係要求多多既男朋友都覺得刺身新鮮好味，我就鍾意佢D炸野，
而且選擇多! 走既時候已經稔定下次要同其他frd再黎食過!
以後去旺角食飯就多一個選擇喇~

推介美食: 帶子串燒,海蝦天婦羅,日式炸豆腐
是次消費: 每人約HKD180 (晚餐)